حوار مع النجم السوري ربيع سلوم خريج برنامج أحلى صوت the voice النسخة العربية 2019.
- حاوره: الصحفي والمدون علي فارس
مرحبا ربيع اهلا بيك في ركن #هلا_بالنجوم على موقع #مجلة_أمل كل المحبة والدعم منا ليك...
- أولا مبروك العمل الفني الجديد ماشاء الله عليك، صاير نشيط بالفترة الأخيرة، كذلك ما ننساش نعاود نهنيك بعيد ميلادك.
- اولا شكراً كتير الك على اللفتة الحلوة منك الاعلامي المميز علي فارس، ولموقع مجلة أمل وتحياتي كذلك للشعب الجزائري.
- طرحت الأغنية على طريقة لايريكس فيديو، لماذا لم تصورها فيديو كليب وهل هذه الفكرة واردة؟
- بالنسبة لموضوع الاغنية التجئت ل ليريكس فيديو لاني حسيت الاغنية بيلبقلا هالنوع من الفيديو وبالنسبة للفيديو كليب، انا عم حاول قد مافيني اشتغل على موضوع الكليب بالأغاني الجاية.
- احكيلنا عن اصداء الاغنية؟ وهل تلقيت الدعم الكافي؟
- الاغنية والأصداء ما كانت مثل ما كنت انا متوقع توصل، الحمد لله ما اجاني عليها ولا تعليق سلبي، بلعكس العالم كتير حبوها بس الفكره ما فيه دعم عليها كرمال هيك ماوصلت للتوقعات المطلوبة.
- بالعودة الى مشاركتك في برنامج ذا فويس، كيف استفدت من هته التجربة؟ وهل مازال الجمهور يربط اسمك بالبرنامج ام اصبح اسمك مستقل؟
- بالنسبة لبرنامج ذا فويس كان تجربة حلوة طبعاً استفدت صار عندي خبرة اكتر، واسمي انعرف اكتر على مستوى الوطن العربي.
- نعم اسمي بعدو مرتبط نوعاً بالبرنامج، بعدو الجمهور بيقول ربيع يلي غنى ما اروعك.
- انت تعيش حاليا بدبي، لماذا اخترت دبي بالضبط؟
- انا كنت مستقر بلبنان قبل دبي من بعد ذا فويس اجاني فرص عمل في دبي وهذا السبب يلي خلاني استقر بدبي، ويمكن الايام الجاي استقر ب اوروبا.
- هل أثرت الاوضاع في سوريا على مشوارك؟
- لا، الاوضاع بسوريا ليست اي علاقة لا بشغلي ولا بمشواري الفني بلعكس كل شي لحالو.
- الأغنية السورية أصبحت موضة ولها وزنها حاليا، انت كفنان سوري صاعد هل ستغني باللهجة السورية ام انت مع التنويع في اللهجات؟
- اذا لقيت شي مناسب لي بلهجتي السورية اللهجة الام اكيد ماعندي اي مشكلة، وطبعا انا مع اني غني بلهجة بلدي يلي بشوف حالي فيها، واكيد انا مع التنويع باللهجات.
- مين من الفنانين السوريين تتابعهم وتستمع الى اغانيهم؟
- الفنانين السوريين يلي بتابعهم اكيد السلطان جورج وسوف بالمقدمة، يلي كلنا منتعلم منو طبعاً، وبسمع ناصيف زيتون يلي هو الاهم بسوريا بعتقد حالياً.
- شو رأيك بالكوفرز اللي عاملينهم الشباب لأشهر الاغاني؟
- حلوة، وانا معهم يعني فكرة الكوفرز مرات عم تكون احلى من الاغنية نفسها فمش غلط بلعكس كتير حلو.
- شو بتفضل تغني كوفرز او اغاني خاصة بك؟
- والله الافضل طبعاً الاغاني الشخصية اكيد كل شي مستقل احلى بس ماعندي مشكله كمان غني كوفرز مش ضد ابدا وقبل مره عملت كوفر عراقي وجبلي أصداء منيحه على سوشال ميديا .
- هل جاءتك عروض تمثيل؟ وهل ممكن نشوفك كممثل؟
- جاءتني عروض تمثيل اكتر من مره بس انا ما بشوف حالي ممثل، ونفس الوقت ما بحب اتطفل ع شي مش لإلي فيه غيري درس وتعب حتى ياخذ فرصة مش لاجي آخذها منو فقط لأني مشهور.
- من غير الغناء، شو هي مواهبك الاخرى وهواياتك، وكيف يقضي ربيع اوقاته و يومياته؟
- من غير الغناء انا بعزف الات ... عود غيتار بيانو ايقاع بزق، وبحب السباحة وهوايتي المفضلة الطبخ كمان .
- احكيلنا عن مشاريعك المستقبلية؟
- مشاريعي المستقبلية حاليا ما عم خطط لشي بس فيني قلك عم اشتغل ع اكتر من عمل ان شاء الله رح ينزلوا بالفترة الجاية شي رح يكون مختلف عن قبلو شي رومانس اكتر وفي شي كمان باللهجة المصرية كمان رح يكون مفاجاه، وضروري نوع انو كل الأعمال يلي عم تنزل هي من انتاجي الشخصي مافي حدا بساعدني بشيء.
- انت من المشتركين القلائل اللي استمروا بعد برنامج ذا فويس وخاصة الموسم اللي كنت مشارك فيه، ليش برأيك ما في استمرارية؟
- مافي استمراريه لانو بصراحة نحنا بس خلصنا من البرنامج مابقا شفنا اي دعم ابدا من اي جهة، الشركات عم تتجه لتشغّل الاشخاص يلي ما بيغنو وقت، انت بتتعب وماعم تلاقي نتيجه، بتصير بتحس حالك عم تشتغل ع الفاضي انا اكيد ضد هالشي بس هذا الواقع.
- بعدك على تواصل مع زملائك من البرنامج؟ واذا نعم مين هم؟
- اكيد بتواصل مع زملائي مثلا ميشيل، ومهدي، وطارق، وبهاء... الحمدلله علاقتي بزملائي كثير منيحه.
- تطبخ في البيت والا تاكل برا؟
- ذكرت قبل هواياتي الطبخ كتير، بس انا بحب الفاست فوود بشكل كبير كتير يعني عشق.
- مدمن سوشل ميديا والا مستخدم عادي؟
- لا مش مدمن، أنا مستخدم عادي ما بحب كون كتير اكتيف بحس حالي غليظ.
- اكثر 5 مطربين تسمع اغانيهم؟
- مطربين اسمع اغانيهم: وائل كفوري، معين شريف، جورج وسوف، ناصيف زيتون، مع حفظ الألقاب طبعا، وبحب بهاء سلطان جداً من مصر وحسين الجسمي من الإمارات.
- لهجة حابب تغنيها عن قريب؟
- لهجة حابب اغنيها إن شاء الله المصرية، وعلى فكرة فيه مفاجأة قريباً. استنوني.
- فنان على بالك تغني معو؟
- فنان بحب غني معو مافي حدا محدد الكل بصراحة.
- بلد بدك تزوره او تغني فيه؟
- بلد حابب زوره، عربيا بحب المغرب العربي كلو تونس الجزائر المغرب... كلن بتمنى زيارتهم، وبالنسبة لأوروبا فإسبانيا اكيد.
- كنت سعيد جدا بهذا اللقاء الشيق ، واتمنى ان تكون انت كذلك مرتاح معنا ، كلمة أخيرة لجمهورك ومحبيك، و لموقع مجلة أمل.
- شكرا كثير على هذا الحوار الممتع واللفتة الطيبة تحية ليك علي فارس وعلى الأسئلة المهمة، وتحياتي لفريق موقع مجلة أمل الجزائرية العربية و لكل جمهوري انتظروني أكيد في اعمال جديدة قريبا، وكل أخباري تجدونها على موقع مجلة أمل، محبتي ربيع سلوم.
ليست هناك تعليقات:
إرسال تعليق